Manat Ni Ine

Ini tekek manat ku Ari aku urang tuemu mayak ku Ku upuh bajung ku engge luah ari aku mayak ku Kau tengah mude ku luahi sinte Aman ari tuhen te ku kite bebewen te Buge kati semperne murip mu puren Olok di uwes mu asal lelang Ilene akal mu mayak ku. Kin keni tubuh mu asal singket ilen pemeker mu mayak ku.. Turah pane ko bercunto si jeroh I tunung ko, jeroh urum sudere Salah tekek enti dewe..tetahi kesalahan te kati mulie pure Bertutur gelah pane natu ate urang tue mayak kuo Enti sawah ku benges saket nate ni urang tue mayak kuo.. Ku uken kao ber ine kutoa ko ber ama enti sawah mu beda Rues urum tungku beta le si jeroh e turah I timang ko.. Ini manat pengen ari aku mayakku  ini manat ken nemah beluh mu bayak ari aku urang tue mu soboh terang lao kami julen kao nemah kero mayak kuo ike reduk pe lao I teger ko mi atemule  mayak ku.. kao torah beluh munetahi naseb semperne ni murep tuah mu bahgie oya nge I garesen ari tuhen te ini harapan ku ari aku urang tue mu le mayak ku, bahgie mi rowan mu rum doa  ku kukirim mayak ku, buge nguk ken seserenen tempat ku berlongoh bier I basahi uren bier I poraki lao payung si kukemangen longoh gere turuh..selamat si beluh asal ruluh nong atengku mayak ku... nge atengku tubuh bajungku nge beluh mayak kuo bier pe kao  jarak ingeti kase ku kao rerowan mu selalu mi munuju bier pe berperawu..enti sawah mu balek..ini manat kuo rowan mu mayak…ini manat kin nemah beluh mu ari aku urang tue mu....
song  artis gayo

Melengkan Munyerah Rempele

Assalamu’alaikum wa rahmatullahi wa barakatuhu,

Tengku, Reje,daling kolak kire ken seserenen, kayu rubu kire ken pelongohen, beserta sarak opate, si timang kire beret, sijuel kire murege, si kami hormati. Sudere-sudereku si alang tulung si beret berbantu, beserta ama ine si wajib tetah si perdlu tentu, si kami hormati. Kaum muslimin dan kaum muslimat si ikut patut, si layak laku, si wan batang ruang ni si kami pemeliei. Urum-urum kite mungucep puji syukur te ku hadirat Allah SWT, kerna ku kite nge iosahe terutama sekali berupe kesehatan dan kesempatan, sehinge kite nguk murum wan batang ruang ni dalam rangka menyelesen janyi antara masyarakat......urum masyarakat…... Selanjute selawat serta salam te kite sawahan ku nabi Muhammad SAW beserta keluarga dan sehebet-sehebete. Salah satu jelen sitaringne ku kite, yaitu membangun rumah tangga bahagia melalui akad nikah yang sah, insa Allah porami kite saksiken urum-urum.

Reje, Tengku, Guru ni kami, hek penge pulih, gigih pe nge teduh, ara ilen kata serah urum kata terime wan sinte mungerje, beta asal manat ari Muyang Mersa ari Negeri Antara urum kata pusaka ari Negeri Linge. Tuh tibuk jele ikemang, ganti ni kulit manis kacu bunge lawang, sepuluh jejari bang kami tatang kati enti terutang bang akhirat dunie.

Reje, Tengku, Guru ni kami, kami atas nama masyarakat……selaku Sarak Opatte beserta papah ni rempele, munatangan jejari sepuluh ku Tengku Reje. ampun kire ku Allah, maap kire ku tuah bahgiente. Oleh karena kami mele munyawahen keber singket berite selalu ku Tengku Reje, orom cerak kire sara patah, orom peri kire sara kelimah. Berhubung karena delah sigere bertulen, bibir gere berdeku, ipon pe gere berbelide, kune metehe wan cerak sara patah, urum peri si sara kelimah, si patut termulo nge kupuren, silayak ku kiri nge salah pari ku kuen, ini pe gelah berijin Tengku Reje mumaap ne beriringen kire selapismi si kami tiro ike pantase kase berulo, ke lemem me kase bertona.

Reje, Tengku, Guru ni kami, atas di nge tangkok ni baur, relem di nge kire ngilih ni arul berkat doa ni Reje beserta sudereku, kami nge selamat semawah ku batang ruang ni kite. Beriringen naru, bertenamunen kaul. Wan iringen naru urum tenamun kul ni singuk kami perin ara le tulu curak, ara si tetue si munemah taluk idenne, ara si memude si munemah porak rayohe, ara juge we kekanak sedang si munemah gagak gigike, ta kerna ari delewe ara si kul ara si kucak, mudetak udah roroh ni tete, mudengèt kadang tulak ni pintu, ini pe gelah berijin Reje mumaapne. Atas wajib tetah perdlu, tentu ni Reje beserta sudereku si ara isinen, si nge mungunul ni kami ku si mu tete si limus tarahe, singe mulongoh ni kami ku si musupu si rapat semate ini pé gere depet kami mu belese, malahan kami serahen ku Allah SWT.

Reje, Tengku, Guru ni kami, tertib bermejelis, umet bermulie. Berjurahen kire kite mangas keranam pirak batil tembege. Ke munurut mangas si jurah ni, Tengku Reje, setelah kami uke nge mèh ara. Setelah kami rasa nge cukup semperne. Gere ara si cacat rupe e si nguk kami perin, si agih-agihe. Ta kerna ara mangas si ari……ke belōe tumung gagang, ke pinange pe nge bereden, kapur putih bersih, berpilih mien kacue pe, ta kune mien metihe, rasa ni kapur kadang olok tu apak, mera bersurak mangas mungerje, rasa ni belō kadang olok tu mung kerna dirine temung wa ari rebe, konyele pe ara wa sara tengkah, oya pe perah we ari uten so, pinange pe kedang kurang rengkah, oya pe ben mah we ari Singah Mulo. Bako e tikik ara wan tape, oya pe ari pake ni sine itiro, ike kacue pe urum bunge lawang nge ku Kala Simpang, turun urang Serbe. Tekadang lebih tu mangas nipe, tekadang kurang, kami tatangen jejari sepuluh ku tengku Reje, ke salah ku Tuhen kami tobati, ke salah ku Reje, kami tiro maap.

Reje, Tengku, Guru ni kami, ike gere salah inget kite urum lupen, siwah bulen i alam baka, ike tun due belas, ketike si pitu, waktu si lime, lahir kiree buah ate si jantung rasa, wan rilingen gere mu gegerak, iosah keroe awal tasak, iperin gerale budak, nge sawah pitu lo kamulen sudere orom biak itos kenduri si lungi lemak, ibuh gerale si cacak-cacak, ke buge-buge nge kaul we mu mengen cerak, ini le harapen ari kite jema tue. Sawah kire ketike hat ingee, ijulen ku mersah iserahen ku Tengku, kerna nuntut ilmu, oyape turah beta perintah kene agamante, ke munurut ilmu si perahe, ara le nge demu tikik, cume dele pedi si gere ilene, ini pe kite ucepen alhamdulillah, ike mu pestak kase pejer, mu biner kase mata ni lao, orom-orom kite mungenali inih si mumatae.

Reje, Tengku, Guru ni kami,ari serlo ku roa lo, ulen pe mu pepinah, tun pe renye mugeganti, ari meh kemokotne, lagu si gere patut pesesuk sara tapak, lagu si gere cacak pejejik sara saka, ringen kire e berberet, warus kiree berwajib.

Ta kene detur ni pungi bang ulu ni gajah, timul ni serlah i Mentari. Turun niemun si munemah basah, gumpel ni emun si munaso nami. Muninget mi bang kite Reje kin firman ni Allah, oya bang kati turah munurut sunah ni Nabi, asal nge inipe ke si bijak we berulih kata, ike si pantas we berulih saka.

Reje, Tengku, Guru ni kami,angin muasal ujen mu usul, bueteni betul muasaliah. Rupe-rupee pepien bulen si ku kuduk ni ara le rayat ni kami berdediang ku …… mu balik panang ku …… Tersesino we ku para buang, telas bunge kemang ujung ni lepo. Tercecerak iwani bajak, tercecari iwani warung kupi. Ike salah cerak mera we rusak, ke salah cari mera we gere mujadi. Kemana ini gere kire salah cerak, gere kire salah cari. Ari……nge be kénak, isinenpe renye nge munampi. Berakah i doyah mungenaken uah, sawah ku umah si muruang. Sene i telege mujadi bunge tibe ku elem-elemen si mududuk ni tenge. Sene bubak sene telege, sene ni kekanak sawah ku kite si tetue.

Reje, Tengku, Guru ni kami, gelah mi bang kite muninget kin manat si tetue jemen. Ike muraliki buet gelah ari perdue, ike munutung rara kire ari dapur, kati enti bang kase jerilep ni gule pelulus mangan, cereng ni peng penjelas ni utang. Oleh kerna doa mutali sempena mutingiren, berlangkah kire si tetuente diang-diang berkekede, terkekune mungenal biak, tercecerak mumerah sudere, sesire mujulen amal tidur nipi jege, kin sarat kire yakin, kin tene kire kuet. Nge pepien lo ari one ke menurut amal tidur urum nipi jege gere kire si jeroh tu, gere kire si legih tu, si nguk kami perin terhinge-hinge kire kin uah ni bemen, rasa-rasae lagu pangan iken beta kene kata oleh te. Ari bulet ni pakat tumung ni peden, antara toa urum uken, ratip lagu si musara anguk, nyawa lagu si musara peluk. Rasa ni pinang si ruluh pe lagu si nge ulak ku tampuk, ken kupe gere urum jema, antara kite we urum kite simahatte antara aku urum tengku Reje. Bertetah kire kite nemah, mujurah kire jenujung ni ulu, muserah kire tenemeng ni pumu. Ke menurut jemujung ni ulu, si agih-agihe tenemeng ni pumu pe beta demikien si nguk kuperinen. Kebet sara lie, ruje sara benang. Ke putihe berbilang, kuninge bertimang, iring dari noya, tempat tidur si lengkape, ini nge le kite bersi wajiben.

Reje, Tengku, Guru ni kami, ike i langit bintang tujuh, ike i tuyuh kal pitu mata, umah pitu ruang, penulang pitu perkara beta kene wan sara kata. Edet bak kata Merhum, hukum bak Siah Kuala, ukum si gere nguk pipet, edet si gere nguk belle. Mate ni ukum wan ni hejetihet, mat eni edet wan istana ni reje. Ike kintis mulu, keloang mu tungku, kurik muku, uyem pé turah mu tengelu, beta kené manat ni Muyang Mersa.

Reje, Tengku, Guru ni kami,atas di kire Burni Kelieten, atasen ilen Reje munurut penengonenku. Kuldi kire Burni Telong, kulen ilen Reje munurut pemanang ni matangku. Reje le si ku tangak atas, Reje le si ku dokop kul. Oleh kerna nge mu janyi aku urum Reje terbilangen si jeroh, tar ketike si bise, rempak nge kite umpama pucuk, jeram nge kite umpama tunes. Ike ku langit nge mupucuk kemang, ke ku bumi nge mujantan tegep. Bulet nge kite lagu umut, tirus nge kite lagu gelas wan batang ruang ni. Keta besiloni tengku Reje, ike narupe we, we ari pemuncak, ike narupe cerak, sara we mustikee. Keta besiloni tengku Reje, ike si tulu tepang, si murancung pingang, si berbulang kerawang, si berules urum upuh kerawang, si kunul atan ampanga, si terlelaha kase jemae. Ike taris nahma kirimen rempele ini nge nama hujute.

Ini le si kuseraen ku tengku Reje. Munerime mi kire Reje, lebih urum kurang kutiro maap. Awal si berpemulon, akhir si berkesudahen.

Assalamu’alaikum wa rahmatullahi wa barakatuh.

Jeweben Reje (Sarak Opat) Pihak Putri

Assalamu’alaikum wa rahmatullahi wa barakatuhu,

Reje, gelah kami belesen bang pora kin keranante. Selangkan ara kene pake, tebang ni bebeles, ceding ni bertunes.

Reje, kami si menerima nipe singuk iperin disne wa kite, ari si Opat. Kene kate oleh te, uten gere penah museruk, peraturan gere penah salah, kite we udah di silep. Lagu kedah katan te, edet te turah iamat enti luwah. Betawe resampe enti sawah tempier, peraturan wajib iperalai, edet si kite amat turah ipejamuri.S

Reje,tikik mi kite tambahan, kami pe muniro ampun ku Tuhen urum ku Nabi. Kemuduk noya, kami tiro maap ku tenamunen si mu bahgie.

Reje, sebenare, mera we segeleé mu ubah, beta we mukimpe mu pinah, lagu perin Reje ne.

Reje, ejed urum niet, urum seijin ni Empue. Kelam si sara kelemni, rempak kite bilang ni re, susun kite bilang ni belō. Reriah kite reriye. Enta kune galak te, enti muselpak, arok te enti mupolok. Sana si sawahni Reje, konote gere ne si sipet, narue gere ne si setai, kōle gere ne si dokopi. Pues nge ate se munerime e.

Reje, wali ukum wali nikah, wali ni anak jema tueé, wali ni reta empe

Reje,si nguk kite perin pemetih te, edet ni berseseren ku ukum, edet urm ukum musipet ujud, ukum munukum musipet kalam.  Edet mengenal, hukum mubeda. Kin si perin sinte, warus berwajib ringen berberet, mokot olok nge arae. Ari entah turun ku muyang, ari muyang turun ku datu, ari datu turun ku awan, ari awan metuh ku ama, ari ama baru sawah ku kite.

Reje, katae turah kite penieti, kuburre turah kite entongi. Sawahen doante kati temas kin tonne.

Reje, buet si kite tetah ni, sara ijadin rowa, ini sunah ni Nabinte.

Reje, ari perang mu pangkal, kerje musukut. Alas pedenang, kite petama. Sikatan mangas wan batil, rokok wan cerpa, kemana oya pe nge penanti. Alhamdulillah, sene bubak sene bubo, berakah i joyah sene i telege, ahire bebuah i umah pitu ruang.

Reje, murip ikanung edet, mate ikanung bumi, oya le kati becerak gere nguk bubak, berperi gere nguk bubo.

Reje, berkat do’ate urum-urum, ke gelap iterangen, kati persah, ke sakit itawari kati jeger. Mate ni gajah i Padang Sari Bulen, ukum ni anak i kaki ni Reje. Kite gere mubantah Hakim munupang Bale ku dene si benar, si lagu ibuetni si tetuente. Gere kite intei sikatan mujorol nipe, mulumpet katak, munyemer kalang, ke ku uten bercengkeh beliung, ke ku kampong pantik genuku.

Reje,atuk ni Reje, ehem ni kami. Suke ni Reje, galak ni kami, kati buetni musampe sahe, musemperne munge. Tikik mi kami tamahen, ke kuyu keras berpenampong, edet turah berujut, piil turah berupa. Ketante terang perin te selese, si kuning keta nge betimang, ke si putih keta nge bebilang. Konote nge kite jengkal, narue nge kite depa, kōle nge kite dokopi. Gere lebih gere kurang, nunung si agih-agihe we, begi janyinte. Sana si serah ni Reje ku kami, sikatan taris nume kirimen, rempele namah hujute. Nge kami terime urum ate putih urum dede lapang. Dalame beta, gelah urum-urum kite mumapahi e, buge gere mukunah urum muhali. Wan kata edet penah kite penge: “Itepa enti musagi, ibuli enti mutangki, turuhen dene seikhlas-ikhlase. Iamat enti muluwah, enti rusak, itatang enti osah metuh, irengom enti muluwah.”

Reje, munengon bereni rara porak. Kerje berwali, utang urum ido mu saksi. Tikik mi kami tamahen, si perin nume kirimen, rempele namah hujute, nge kami terima, nge kami saksin. Item e item manis, putihe gere pucet, konote gere dopot, narue gere murewat, kurus e kurus mampat, gotole gotol belangi. Si nguk iperin, buetni lime belas urum tengah due puluh, senare opat kal, sehasta due jengkal.

Reje, keta se ni gelah kite sawahi renyel sikatan ukum, si perin akad nikah.

 wasalamu alaikum warahmatullahi wabarkatuh

Melengkan Turun Caram

Assalamu’alaikum wa rahmatullahi wa barakatuhu,

Reje, kami si gehni tose ara opat lime jema, pertama pedi selapis munentong ari Reje, kemuduk ari oya tose, tikik ara ejet niet angan kasad, gelah bang kusawahen tikik mi kati muperseh terang. Kami si gehni ari si Opat.

Reje, ejet niet angan kasad ari muloe berakah male ken tuah, kemana male bunge bang mujadi uah, oya Empue si mumetihe. Enta kune oyape turah kite sukuri urum-urum.

Reje, buet ni tose gere nguk gantung tunung patah titi, buet ni si ara ni jema, ni pake, nge turun temurun, nge tane temane ari pudahami.

Reje, begi peri sine, gelap ngenaken terang, kuyu keras turah berpenampong, edet berujud, piil berupe, semi bertubuh, langkah ni si nguk iperin ike kite ulaken ku edette, beramat-amaten kite kusi nge munge. Kene sitetuente turun caram berjule emas edet si katan unyuk kata oleh te.

Reje,gelah kami tenumpit mi bang ku tenumpit te si king, si katan kuning nge betimang, si perin putih keta nge bebilang.

Reje,ujut baru berubah, mungkin mera mu pinah, matani mera mu sapur, terang bagi kite heme. Mera we mu taluk iden, mera we mu lupen lale.

Reje, enta kune kenge melengkan seperti murum-murum kite, ke siselput lepas inarun, ke si konot nge kite jengkal, ke simunaru nge kite setai, ke si kul kasé nge kite dokopi. Ini mana nama hujuté, kami nahen ku kite. Gelah selese ikekesi Rejengku pedih. Genap ini padehe si nguk kusawahen, lebih urum kurang ku tiro ijin.

Wasalamu’alaikum wa rahmatullahi wa barakatuhu

Jeweben Sarak Opat Pihak Putri 

Assalamu’alaikum wa rahmatullahi wa barakatuhu,

Reje, gelah ku belesen bang pora keranante, tebang tose berbeles, ceding bertunes, jontok gintes beta kata oleh te. Kemana si perin empu ni edet, si munyawah ni kesah alus, kona bang turah ulu ni edet munerimee.

Reje, begi peri sine, gelap ngenaken terang, kuyu keras turah berpenampong, edet berujut, piil berupe, semi bertubuh. Langkahni si nguk iperin, ike kite ulaken ku edet te, beramat-amaten kite ku singe munge, kene si tetuente, berturun caram berjule emas. Kin edet sukatan unyuk kata oleh te. Kemana si perin empuni edet si munyawah ni kesah alus, kona bang turah uluni edet munerimee.

Reje, gip ilen kite nge petama, pintu nge beruke, alas nge pedenang. Ke si perin angan kasad ejet niet, kati enti gantung tunung patah titi. Oya asal kene kata oleh te. Nge beta kene edet te. Ke amate turah mu tubuh, pangan ne turah murasa. Engon sareh panang nyata. Kuyu keras berpenampong, piil berupe, semi bertubuh. Kesi katan kuning nge bertimang, si putih nge berbilang, gere lebih gere kurang, si nguk iperin si agih-agihe we.

Reje, selapis lagu peri sine, tose kamini mi we si mutang ku ari Reje. Enta kune oyape urum pakat jeroh genap bise. Utang ke turah berjelas, ido turah betungu. Ara tuen, ara akal, ara bicara. Ke nge tumung peden te, nge bulet pakat te bewene nguk ilagu. Sarami enti kite lupen buge enti muhali urum museli, mu tungku urum mu tingki. Pulang kadang lang ni lo, gere kite tiro, begi sikatan langkah rejeki petemun urum maut. Kadang enta sana kase si mulintang semawah ni kami ku Tengku Reje.

Reje,semantung silep semerlep lale. Jerohen ling mutali ulang, kati tingkis ulak ku bide, sesat ulak ku dene. Kadang pulang turah berulo, kadang mupuren. Mutuker kadang mutakir. Tingkis kadang mantut, ke benang gasut ulaken ku elangen, anak mongot ulakan ku inee, belō ulaken ku rudang, pinang ulaken ku tampuk, pucuk ulaken ku mayang.

Ke bedalil ku bulet ni pakat tirus ni genap, selapismi miyen kene awan anan te. Nerah ku langkah urum perbintangen, nge idedema enta tar empat belas rebulen arapni tose sinteni kite luahi.

Reje,oya mulo narue si nguk kami sawahen ku kite dang-dang sawah kin hat ingee, kedaheso korong bang atente, pues nge rasae.

Wasalamu’alaikum wa rahmatullahi wa barakatuhu

Jeweben Sarak Opat

Assalamu’alaikum wa rahmatullahi wa barakatuhu

Sudere-sudere rawan banan, kul kucak, tue mude, tuen rintah bebewene si isienni. Kami belesen bang pora keranante, perang mupangkal, kerje musukut seni. Utang si opat, warus berwajib, ringen berberet, nge sawah hat inge e. Bade kuyu remalan gere tersesilun, uren topan wih mugemboyah gere terampon, buette turah wa mujadi, edet ni Reje turah wa ilalui.

Ari bulet ni pakat, tirus ni genap. Ratip musara bilang belo, si berat nge ringen, si naru nge konot, si nyanya nge temas, si bise nge tawar, si mugah nge magih, si jarak nge dekat, enta kune galakte enti muselpak, ayunte enti mupolok. Alhamdulillah ike bededele urum bererami, ike atas pe bur, tuyuh ni tapak, ike lues pe langit lepas kite tangak.

Si sawah ni perang, mupangkal kerje musukutne, kami engon ku edet, kami dema-dema kuatur, kami simak-simak kuresam, insa Allah kami pe nge paham. Ike narue nge kite engon ku ines, ke tungku èngon ku tau, ike sisir engon ku awal, ike mata engon ku pelu, ike benyer engon ku gantang, narue gere ne kite setai, kul kucake gere ne si dokopi, buetni nge agih-agihe.

Wan murip ni bareksana buet, awale turah berpemulon, ahirepe turah kase berpenampongan, naru tali sara puncee, sara ralik sara ujung iurumen menjadi sara. Oya tamsil sara enti kite lupen. Enti sara kite ku mata nilao, wan telbong enti sawah murip kelah, wan jumpun enti ara mu pulo, wan cing enti ara mu kilo. Geh kase rahmat apabile kite sara peden, geh kase laknat apabile kite mupecah ataw mudewe.

Boh mi oya selapis kami sawahen ku kite ken amat-amaten, ken tikon remalan, ken suluh sediken gelap. Kemuduk nonya keta gelah kite tujun mi bang ling ni ku ipak ni.

Anakku, anak ni kami, pengenko mulo ling ni kami si tetueni, warus mu iwajiben, ringen mu iberaten, oya nume geli ateni kami ken ko. Gere ko kami tulak urum serde tulak, gere kami senawat urum kayu luis anakku, enti kase gere ibetihko oya sunah ni nabinte ari pudahami, wajib ukume.

Konot mu nge bernaru, kucak mu nge berkaul, ara nge si arae kami ku beden tubuhmu, baik akal urum kekire, walaupun beta anakku, kami sawahen miyen kesah alus ni kami, buge enti kase luput urum lupen ipakko.

Murip ikanung edet anakku, mate ikanung bumi, murip turah benar, mate turah suci. Ling mu anakku king mutentu, ke narue gere lepas tersipeti. Ling ni kami ni pe gelah jeroh ipejamuriko, ari kemokotne kase makin ibetih ko sana de hakiket urum hakikie.

Boh mi kati mu terang kami sawahen tikik kin tujun ni ling ni. Murip ikanung edet anakku oya peger ni Agama. Becerak ko kase anakku enti sawah bubak, berperi enti sergak. Boh lagu ling ni kami sine, bercerak ko gelah lagu santan mulimak i bibirmu, lagu tikel berbunge i delahmu.

Remalan ko kase enti begerdak, mujurah enti munyintak, atemu turah mumin, tanganmu gelah murah, salak enti osah kerut, budi pekerti turah belangi. Si tetue imelien, kekanak isayangi, si nyanya ike ara rejekimu, gere dele tikik itulungko bantu ko anakku.

Terjah empah, tangak tonga, keliling juge, kahar kaharullah, buh tikik pe enti ara iko, kena oya sipete kemali ipak, sumang si opat ijauhi ari kite anakku. Sikatan sumang pecerakan si kite peri buh enti sawah jin urum setan singah, si kami sawahni berseseren ku agamante.

Sarami siturah ingetiko, kune ko munedepi kami, beta kase iedepiko ari ume si depetiko, sipet ni si tunging buyung, dedawan lipet sikipes bayur, si mirah mata enti sawah ara iko anakku, kena oya kemali pedi ipak. Ke turah lemut berturut payu, cerak turah berpingang, peri si turah itudun.

Tene ni buet anakku, ko rerowanmu turah sebegi seperangen, temas urum-urum, temas nyanya bersitunungen, bersipengen bersiejeren, selangkan ara kene tetue, ike ate murai ate, ungke pe rasa gule, ike ate gere murai ate, bawal pe disne lagu bangke, tekedir muterkuk kuren urum senuk. Enti sawah kalang pepot mujadi rara, ketol rok mujadi nege.

Anakku, si lime waktu si katan wajib porape enti taring. Oya tiang ni agama. Rukun Islam, rukun Imen oya ken amat-amaten, oya isi ni kitep sucinte. Alhamdulillah anakku kami suntuk mudoan mu buge mujadi anak si mutuah, anak amal saleh ni kami. Ike itunung ko kase ling ni kami ni insa Allah langit mu gere mu gegur, bumimu gere muguncang.

Enti juh pikirenmu, enti awang ken kekiremu, segermi kami sawahen wan batin alus ni kami, kami mudoane, panyang mi umurmu, mudahmi rejekimu, enti ara si mulintang sana si buetko, Tengku si munyerahen ko ne ku kami, selangkah ni se, selangkah ni kami, pulih mi zat mu, pulih sipet pulih nyawa, pulih tubuh, pulih segele anggota, kur...semangatmu anakku.

Oya le we si lepas kami sisun ku ko anakku, ingetiko kase seseger kami anakku, enti sawah ko kase lupen ken blang pediangen urum denget ni pintu ipak anakku.

Assalamu’alaikum wa rahmatullahi wa barakatuh.

Melengkan Dalam Beguru

Assalamu’alaikum wa rahmatullah wa barakakatuhu

Reje, aku si bercerakni ari doa sempenani perang, mu pangkal kerje, mu sukut nge kamul ralik juelen. Wali porak, wali sejuk. Cabang nge murai cabang, ranting nge mu nangon ranting. Biak gip/jarak, biak dekat si nguk iperin rempak nge bilang re, susun nge bilangni  belo. Gere ne ara si taring maring.
Reje, risik urum kono mokot di nge arae ari Rekel, turun ku entah, ari entah turun ku muyang, ari muyang renye awan, renyel ku ama, ari ama baro sawah ku kite besilo ni. Si nguk iperin nge mucap ku atu mulabang ku papan.

Reje,ari awal ni buet si katan serah merah. Selangkan ara kene ure-ure, opat ganyil lime genap. Si keroh ken inom, si jernih kén pembasoh. Beta kata olehte. Nunung edete kati sah kerje mungerje jemen pudaha.

Reje,lahir buah ate jantung rasa, pertama iturun manin, kedue ikhitanen, ketige iserahen ku ama guru, ke empat waruse berwajib, ringenn berberet.

Reje, wan kemuduk ni lo ni, kin cico ni manuk, kin kelik ni kalang, ari bulet ni pakat, tirus ni genap, nge le kami denangen alase, nge le kami cecepen ken belo si munon pitue.

Reje,kusisun kire pora ike bedalil ku edet te, si male ken biak teni. Nume si bergeral datap ari Batak, nume si bergeral ranup ari Aceh, nume sirih ari Melayu, tapi bergeral belo ari Gayo kampunge......

Reje, berseserenen kite ku amal tidur nipi jege, kire gere musier, gere muhali, gere mupolok, gere muliki, singuk kite perin mampat urum belangi insa Allah buge betami kase agamae pe, urum budi pekertie, buge lepas kase ken alang tulung berat bantunte.

Reje, ken sarat yakin tene kuet, sarat denem tene muninget. Kami nahen ku tenumpit ni Reje, beras padi tungket imen, pinang ari si mutampoke, belo wan rudang, mayang ari Serudang, kapur kacu bunge lawang, konyel pe ari uten oya peserinen ne munangoe, iringi sara rilah ringit tene idung, bertetunung tali puter tige.

Reje, kur semangat, kami jurahan sara mungkur uten, wih muter si gere mera kering, lopah tejem si musembilue, kati iyeles ni Reje kén pangir mutuju, buge pulih zet, pulih sipet, pulih nyawa, pulih tubuh, pulih anggota tujuh. Ike si bise buh tawar mi, ike si mugah buh magih mi, sejuk peruntungen ne, gelah mudah rejekie.

Reje, kite manat petenahi mulo ipakni, iejermarahi, kati we kase remalan enti begerdak, mujurah enti munyintak, becerak enti sergak urum bubak, buh gelah lagu santan mulimak i bebere, tikel berbunge i delahe.

Reje, oya wa tose si nguk kunahen ku sarak opat, reje si musuket sipet, imem si muperdlu sunet, petue musidik sasat, rayat genap mupakat. Reje mubanta, imem mulebe, petue musekolat, maap ku kaum biak urum sudere si ara wan batang ruang ni.

Wasalamualaikum wa rahmatullahi wa barakatuhu