Jeweben Sarak Opat

Assalamu’alaikum wa rahmatullahi wa barakatuhu

Sudere-sudere rawan banan, kul kucak, tue mude, tuen rintah bebewene si isienni. Kami belesen bang pora keranante, perang mupangkal, kerje musukut seni. Utang si opat, warus berwajib, ringen berberet, nge sawah hat inge e. Bade kuyu remalan gere tersesilun, uren topan wih mugemboyah gere terampon, buette turah wa mujadi, edet ni Reje turah wa ilalui.

Ari bulet ni pakat, tirus ni genap. Ratip musara bilang belo, si berat nge ringen, si naru nge konot, si nyanya nge temas, si bise nge tawar, si mugah nge magih, si jarak nge dekat, enta kune galakte enti muselpak, ayunte enti mupolok. Alhamdulillah ike bededele urum bererami, ike atas pe bur, tuyuh ni tapak, ike lues pe langit lepas kite tangak.

Si sawah ni perang, mupangkal kerje musukutne, kami engon ku edet, kami dema-dema kuatur, kami simak-simak kuresam, insa Allah kami pe nge paham. Ike narue nge kite engon ku ines, ke tungku èngon ku tau, ike sisir engon ku awal, ike mata engon ku pelu, ike benyer engon ku gantang, narue gere ne kite setai, kul kucake gere ne si dokopi, buetni nge agih-agihe.

Wan murip ni bareksana buet, awale turah berpemulon, ahirepe turah kase berpenampongan, naru tali sara puncee, sara ralik sara ujung iurumen menjadi sara. Oya tamsil sara enti kite lupen. Enti sara kite ku mata nilao, wan telbong enti sawah murip kelah, wan jumpun enti ara mu pulo, wan cing enti ara mu kilo. Geh kase rahmat apabile kite sara peden, geh kase laknat apabile kite mupecah ataw mudewe.

Boh mi oya selapis kami sawahen ku kite ken amat-amaten, ken tikon remalan, ken suluh sediken gelap. Kemuduk nonya keta gelah kite tujun mi bang ling ni ku ipak ni.

Anakku, anak ni kami, pengenko mulo ling ni kami si tetueni, warus mu iwajiben, ringen mu iberaten, oya nume geli ateni kami ken ko. Gere ko kami tulak urum serde tulak, gere kami senawat urum kayu luis anakku, enti kase gere ibetihko oya sunah ni nabinte ari pudahami, wajib ukume.

Konot mu nge bernaru, kucak mu nge berkaul, ara nge si arae kami ku beden tubuhmu, baik akal urum kekire, walaupun beta anakku, kami sawahen miyen kesah alus ni kami, buge enti kase luput urum lupen ipakko.

Murip ikanung edet anakku, mate ikanung bumi, murip turah benar, mate turah suci. Ling mu anakku king mutentu, ke narue gere lepas tersipeti. Ling ni kami ni pe gelah jeroh ipejamuriko, ari kemokotne kase makin ibetih ko sana de hakiket urum hakikie.

Boh mi kati mu terang kami sawahen tikik kin tujun ni ling ni. Murip ikanung edet anakku oya peger ni Agama. Becerak ko kase anakku enti sawah bubak, berperi enti sergak. Boh lagu ling ni kami sine, bercerak ko gelah lagu santan mulimak i bibirmu, lagu tikel berbunge i delahmu.

Remalan ko kase enti begerdak, mujurah enti munyintak, atemu turah mumin, tanganmu gelah murah, salak enti osah kerut, budi pekerti turah belangi. Si tetue imelien, kekanak isayangi, si nyanya ike ara rejekimu, gere dele tikik itulungko bantu ko anakku.

Terjah empah, tangak tonga, keliling juge, kahar kaharullah, buh tikik pe enti ara iko, kena oya sipete kemali ipak, sumang si opat ijauhi ari kite anakku. Sikatan sumang pecerakan si kite peri buh enti sawah jin urum setan singah, si kami sawahni berseseren ku agamante.

Sarami siturah ingetiko, kune ko munedepi kami, beta kase iedepiko ari ume si depetiko, sipet ni si tunging buyung, dedawan lipet sikipes bayur, si mirah mata enti sawah ara iko anakku, kena oya kemali pedi ipak. Ke turah lemut berturut payu, cerak turah berpingang, peri si turah itudun.

Tene ni buet anakku, ko rerowanmu turah sebegi seperangen, temas urum-urum, temas nyanya bersitunungen, bersipengen bersiejeren, selangkan ara kene tetue, ike ate murai ate, ungke pe rasa gule, ike ate gere murai ate, bawal pe disne lagu bangke, tekedir muterkuk kuren urum senuk. Enti sawah kalang pepot mujadi rara, ketol rok mujadi nege.

Anakku, si lime waktu si katan wajib porape enti taring. Oya tiang ni agama. Rukun Islam, rukun Imen oya ken amat-amaten, oya isi ni kitep sucinte. Alhamdulillah anakku kami suntuk mudoan mu buge mujadi anak si mutuah, anak amal saleh ni kami. Ike itunung ko kase ling ni kami ni insa Allah langit mu gere mu gegur, bumimu gere muguncang.

Enti juh pikirenmu, enti awang ken kekiremu, segermi kami sawahen wan batin alus ni kami, kami mudoane, panyang mi umurmu, mudahmi rejekimu, enti ara si mulintang sana si buetko, Tengku si munyerahen ko ne ku kami, selangkah ni se, selangkah ni kami, pulih mi zat mu, pulih sipet pulih nyawa, pulih tubuh, pulih segele anggota, kur...semangatmu anakku.

Oya le we si lepas kami sisun ku ko anakku, ingetiko kase seseger kami anakku, enti sawah ko kase lupen ken blang pediangen urum denget ni pintu ipak anakku.

Assalamu’alaikum wa rahmatullahi wa barakatuh.